Plantun de Prouvènço

Pèr coumpara dos planto d'encò nostre

Trichophorum cespitosum & Picea abies

Trichophorum cespitosum

Cyperaceae

Nom en français : Scirpe cespiteux.

Descripcioun :
Aquesto bolo fai de mato dins li bas-palun, li tourbièro e riéusset de mountagno sus sòu séusous. L'espigueto de 3 à 6 mm èi souleto au bout de la cambo. Se vèi tres escaumo esterlo e lusènto e la pu basso, mai pounchudo, s'atrovo èstre quàsi o pu longo que l'espigo. La subsp. que trachis en Prouvènço, ié dison cespitosum.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 5 à 35 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Trichophorum
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 3 à 6 mm
Flourido : Printèms - Estiéu

Sòu : Si
Autour basso e auto : 400 à 2600 m
Aparado : Noun
Abriéu à setèmbre

Liò : Tourbièro - Riéusset - Bas-palun
Estànci : Mountagnard à Aupen
Couroulougi : Bourealo
Ref. sc. : Trichophorum cespitosum (L.) Hartm., 1972 (= Scirpus cespitosum L., 1753 )

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.